कञ्चनपुरको बेलडाँडी गाउँपालिका–३ कमरीका एक जना किसान मंगलबार बिहान मृत अवस्थामा फेला परेका छन्। अन्दाजी ५० वर्षीय हरिकिसन रानाको शव बेलौरी नगरपालिका–१० शिवनगरस्थित निर्मल घाट नजिकैको सडक किनारमा जलेको अवस्थामा फेला परेको हो। घटनास्थलमा उनको मोटरसाइकल समेत पूर्ण रूपमा जलेर नष्ट भएको अवस्थामा भेटिएको छ, जसले घटनालाई थप रहस्यमय बनाएको छ।
स्थानीय स्रोतहरूका अनुसार राना बिहान करिब ४:३० बजे गाईभैंसीलाई घाँस खुवाएर कलकत्ता बजार जान मोटरसाइकलमा घरबाट निस्किएका थिए। तर केही घण्टामै उनको जलेको शव भेटिएपछि गाउँमा शोक र त्रासको माहोल छाएको छ। घटनास्थलमै मृतकको मोबाइल फोन, विजुलीको बिल र केही नगद भने सुरक्षित अवस्थामा फेला परेको छ, जसले घटनालाई थप शंकास्पद बनाएको छ।
स्थानीय वासिन्दाहरूले बिहान मर्निङ वाक गर्ने क्रममा मोटरसाइकल जलिरहेको देखेको तर त्यसबेला मान्छे देखिएको नदेखिएकोबारे अन्योल रहेको बताएका छन्। पछि घटनास्थलमा शव पनि जलेको अवस्थामा फेला परेपछि स्थानीय तहदेखि मृतक परिवारसम्म घटनाको प्रकृतिबारे गम्भीर आशंका व्यक्त गरिएको छ। मृतकका आफन्तहरूले यो घटना दुर्घटना नभई योजनाबद्ध हत्या भएको दाबी गर्दै सत्य तथ्यको छानबिन गरी दोषीलाई कारबाही गर्न माग गरेका छन्।
घटना सार्वजनिक भएसँगै प्रहरी टोली तत्काल घटनास्थलमा पुगेको थियो। प्रहरीले घटनास्थलको मुचुल्का तयार गरेर अनुसन्धानको प्रक्रिया अगाडि बढाएको जनाएको छ। घटनाबारे विभिन्न कोणबाट अनुसन्धान सुरु गरिएको र फरेन्सिक परीक्षण, मोबाइल विवरण, तथा प्रत्यक्षदर्शीहरूको बयानका आधारमा निष्पक्ष छानबिन गरिने जनाइएको छ।
यस रहस्यमय घटनाले गाउँमा असुरक्षा र भयको वातावरण सिर्जना गरेको छ। स्थानीय जनप्रतिनिधि, नागरिक समाज र सामाजिक अगुवाहरूले घटनाको सत्य तथ्य बाहिर ल्याई दोषीमाथि कडा कारबाही गर्न सम्बन्धित निकायसँग माग गरेका छन्।
